दाङको क्षेत्र नंम्बर २ अहिले सबैको चासोको विषय बनेको छ । नेकपा (एमाले) का ह्यावी वेट उम्मेदवार महासचिव शंकर पोखरेल नै रहेकाले यो क्षेत्रमा देशभरकै चासो छ । महासचिव शंकर पोखरेल २०५१ सालपछि दोश्रोपटक प्रतिनिधि सभामा पुग्ने प्रयासमा हुनुहुन्छ ।
२०५६, २०६४ र २०७० को तीन वटा निर्वाचनमा उहाँ पराजित हुनुभयो । २०७४ सालमा भने उहाँले प्रदेश सभा रोज्नुभयो । जित हात पार्दै मुख्यमन्त्री बन्नुभयो ।
दाङको क्षेत्र नंम्बर २ बाट चुनाव लड्न लागेका पोखरेल यसपटक नेकपा नेकपा माओवादी केन्द्रकी रेखा शर्मासँग प्रतिस्पर्धा गर्दै हुनुहुन्छ ।
एमालेका वैचारिक नेताका रुपमा चिनिने पोखरेल धेरैजसो नीति र सिद्धान्ताका कुरा गर्नुहुन्छ । राष्ट्रपति विद्यादेवी भण्डारीका विश्वास पात्र र एमाले अध्यक्ष केपी ओलीका उत्तराधिकारीको रूपमा पोखरेललाई कार्यकर्ताहरुले हेर्ने गरेका छन्। अब एमालेको बागडोर पोखरेलको हातमा जान्छ भनेर आँकलन गर्नेहरुपनि धेरै छन् ।
अर्कोतिर माओवादी नेता शर्मालाई पार्टीका शीर्ष नेताको समर्थन छ । पूर्व सभामुख कृष्णबहादुर महराले आफूले टिकट नै त्यागेर रेखालाई अघि सार्नुभएको छ । संघीय सरकारमा मन्त्री भइसक्नुभएकी शर्मालाईपनि कम आँक्न मिल्दैन ।
यो क्षेत्रमा यसअघिको स्थानीय तहको निर्वाचनमा सत्ता गठबन्धनका वडाध्यक्ष उम्मेदवारहरूको ३६ हजार एक सय ४६ मत छ भने नेकपा एमालेका वडाध्यक्ष उम्मेदवारहरूको ३३ हजार ५९३ मत छ । गठबन्धन एकातिर र एमाले एक्लै हुँदा समेत मतमा खासै अन्तर छैन । ह्यावी वेट भएकाले केही हजार मत पोखरेलले तलमाथी पार्ने स्थानीयको आँकलन छ ।
एमाले नेताहरु शंकर पोखरेलको व्यक्तित्वका कारण चुनाव जित्ने दाबी गर्नुहुन्छ । लुम्बिनी प्रदेशको राजधानी दाङमा राख्ने निर्णय गराएकाले त्यसको फाइदा पोखरेललाई मिल्ने उहाँहरुको तर्क छ। पोखरेलले पनि उम्मेदवारी दर्ता गरेयता आफूले दाङलाई राजधानी बनाउने निर्णय गराएको विषय जोडतोडका साथ उठाइराख्नुभएको छ । नभन्दै आफ्नो हातमा हुँदा पोखरेलले आफ्नो क्षेत्रका लागि कयौँ विकासका कामहरु गर्नुभएको छ ।
अर्कोतर्फ विगतमा सामान्य प्रशासन मन्त्री भएकी रेखा पहिलोपटक प्रत्यक्ष तर्फको निर्वाचन लड्न लाग्नुभएको हो । उहाँ संसदीय चुनावका लागि नयाँ हुनुहुन्छ ।
पोखरेलले स्थानीय तह निर्वाचनमा सत्ता गठबन्धनका बावजुदपनि पालिका प्रमुखमा आफ्ना दलका उमेदवारलाई जिताउन सकेका कारण उहाँ यसपटक निर्वाचन जित्नेमा उत्साही हुनुहुन्छ । पोखरेल र शर्मा दुबैका लागि जित निकाल्न कांग्रेसको मत निर्णायक हुने देखिन्छ। शर्मालाई जितका लागि कांग्रेसको सबै मत तान्नु चुनौतीपूर्ण छ भने पोखरेललाई जितका लागि कांग्रेसको मत आकर्षित गर्नुपर्ने हुन्छ। पोखरेललाई दाङ कांग्रेसले सघाउनसक्ने अवस्थापनि देखिन्छ । किनकी त्यहाँ किचलो छ । जे होस् पोखरेल र शर्माबीचको यो पटकको चुनाव निक्कै रोचक हुने देखिन्छ ।
