घोराही, १२ बैशाख  ।जेसिज सप्ताह २०२५ अन्तर्गत जेसीज त्रिभुवननगरद्वारा आयोजित “जेसिज सप्ताह समापन कार्यक्रम शनिबार घोराहीको बाहुकुने दहमा हुने भएको छ । साहित्यिक रसपानसहित जेसिज सप्ताह समापन कार्यक्रम आयोजना गर्न लागिएको त्रिभुवन नगर जेसिज वर्ष २०२५ का अध्यक्ष टंकबहादुर रावतले जानकारी दिनुभएको छ ।

कार्यक्रममा डाक्टर कृष्णराज डिसी, डा. लोकराज पराजुली, दीपक शर्मा समिर, प्रकाश केसी, यमन रेग्मी, सन्ध्या रेग्मी, हरिप्रसाद पौडेल, मनिसा गिरी, श्रवण नेपाली, विक्रम वली ‘नेपाली बाबु’, मनोज थापा मगर लगायतका साहित्यकारहरूको उपस्थिति रहने सप्ताह मुल समिती संयोजक बाबुराम पाण्डेले जानकारी दिनुभएको छ । उनीहरूले आफ्नो साहित्यिक प्रस्तुति मार्फत कार्यक्रमलाई थप आकर्षक बनाउनेछन् ।

जेसिज सप्ताहको समापनसहित दीर्घकालीन परियोजनाहरूको प्रभाव र प्रभावकारितालाई उजागर गर्न आयोजित यस कार्यक्रमले सामाजिक रूपान्तरणमा महत्वपूर्ण योगदान पुर्याउने अपेक्षा गरिएको सप्ताह मुल समिती संयोजक पाण्डेले जानकारी बताउनुभयो ।

छैठौं दिनको कार्यक्रम सम्पन्न जेसीज सप्ताह २०८२ अन्तर्गत छैठौं दिन त्रिभुवननगर जेसीजद्वारा आयोजित Mentor–Mentee Program सम्पन्न भएको छ।

कार्यक्रमको प्रमुख आक्रषणका रुपमा जेसीआई सिनेटर मनोज बुढाथोकी रहनुभएको थियो । उहाँले आफ्नो दीर्घ व्यवसायिक अनुभव र जेसीज यात्राका प्रेरणादायी पक्षहरू कार्यक्रम सहभागीहरूसँग सुनाउनुभएको थियो ।

कार्यक्रममा त्रिभुवननगर जेसीजका पूर्व अध्यक्षज्यूहरू, वर्तमान बोर्ड पदाधिकारीहरू, साधारण सदस्यहरू, दाङ महिला जेसीजकी संस्थापक अध्यक्ष निर्मला गौतम, विभिन्न शाखाका अध्यक्ष तथा पदाधिकारीहरूको उपस्थिति रहेको थियो ।

कार्यक्रमको संयोजकको भूमिकामा जेसी रण बहादुर खड्काको स्वागत मन्तव्यबाट सुरु भएको कार्यक्रममा जेसीज सप्ताह कार्यक्रमका मूल संयोजक बाबुराम पाण्डेयले सप्ताहका गतिविधिबारे प्रकाश पार्नुभएको थियो भने कार्यक्रमको सहजीकरण महासचिव कृष्णदेव थापा मगरले गर्नुभएको थियो ॥

गढवा,१२ वैशाख । दाङ गढवा गाउँपालिकामा योगदानमा आधारित सामाजिक सुरक्षा योजना सम्बन्धी सरकारवालाहरू बीच अभिमुखीकरण कार्यक्रम शुक्रबार सम्पन्न भएको छ।

गढवा गाउँपालिकाको आयोजना तथा सामाजिक सुरक्षा कोष सम्पर्क कार्यालय नेपालगञ्जको सहजीकरणमा एकदिने अभिमुखीकरण कार्यक्रम सम्पन्न भएको हो ।

योगदानमा आधारित सामाजिक सुरक्षा योजना सम्बन्धी सरकारवालाहरूबीच अभिमुखीकरण कार्यक्रममा बोल्दै गढवा गाउँपालिका अध्यक्ष यम नारायण शर्मा पोखरेलले सामाजिक सुरक्षा कोषद्वारा सञ्चालित योगदानमा आधारित सामाजिक सुरक्षा योजनामा आबद्ध हुन सम्पूर्णलाई आह्वान गर्नुभयो। जीवनमा आइपर्ने आर्थिक जोखिमबाट सुरक्षित रहनका लागि सामाजिक सुरक्षा कोष अति महत्वपूर्ण रहेको पालिका अध्यक्ष पोखरेलले बताउनुभयो । आगामी आर्थिक वर्षदेखि गढवा गाउँपालिकाका सम्पूर्ण कर्मचारी र विद्यालयसँग आबद्ध कर्मचारीहरुलाई सामाजिक सुरक्षा कोषसँग जोड्ने बताउनुभयो।

निजी क्षेत्रबाट सञ्चालित विद्यालयहरू विभिन्न संस्थाहरु,वित्तीय क्षेत्रमा काम गर्ने संस्थाहरु, लगाएतका अन्य क्षेत्रलाई सामाजिक सुरक्षा कोषसँग जोड्न अनुरोध समेत गर्नुभयो। सामाजिक सुरक्षा कोषमा आबद्ध नहुने कुनै पनि संस्थाको नवीकरण नगर्ने पालिका अध्यक्षले पोख्रेलले उद्घोष गर्नुभयो । सक्नेले आफै सामाजिक सुरक्षा कोषमा आबद्ध हुने नसक्नेहरूको तथ्याङ्क सङ्कलन गरेर पालिकाले सहजीकरण गर्ने अध्यक्ष पोख्रेलले बताउनुभयो।

साना व्यवसायी, कृषक,मजदुर, विभिन्न उद्यमी महिला समूह, विभिन्न बचत संकलन गर्ने संस्थाहरुले सामाजिक सुरक्षा कोषमा लाग्न अनुरोध समेत गर्नुभयो।

करार र ज्यालादारी श्रमिकले खाइपाई आएको तलबको कम्तीमा ६० प्रतिशतलाई आधारभूत तलब मानी त्यसको २० प्रतिशत रोजगारदाता (सरकार) र ११ प्रतिशत श्रमिकको तर्फबाट कोषमा जम्मा गरिने सामाजिक सुरक्षा कोष नेपालगञ्जका प्रमुख चिरञ्जीवी न्यौपानेले बताउनुभयो।

राजपत्रमा प्रकाशित सूचना अनुसार संघीय, प्रदेश र स्थानीय तहको सञ्चित कोष, नेपाल सरकार, प्रदेश सरकार वा स्थानीय तहको पूर्ण वा आंशिक स्वामित्व भएका संस्थान, निगम, बोर्ड, प्राधिकरण, प्रतिष्ठान वा यस्तै कुनै निकायको कोषबाट पारिश्रमिक पाउने व्यक्तिलाई सामाजिक सुरक्षा कोषमा योगदानकर्ताको रूपमा सूचीकृत गर्ने भएको सहजकर्ता न्योपानेले बताउनुभयो। योगदानकर्ताले खाइपाई आएको तलबको कम्तीमा ६० प्रतिशतलाई आधारभूत तलब मानी त्यसको २० प्रतिशत रोजगारदाता (सरकार) र ११ प्रतिशत श्रमिकको तर्फबाट कोषमा जम्मा गरिने व्यवस्था रहेको बताईएको छ।

कोषबाट श्रमिकलाई औषधि उपचार तथा स्वास्थ्य, मातृत्व, दुर्घटना, अशक्तता, वृद्धावस्था, आश्रति परिवार सुरक्षा योजना उपलब्ध गराउने उद्देश्यले ल्याइएको कार्यक्रम हो । वृद्धावस्था सुरक्षा योजना अन्तर्गत २८.३३ प्रतिशत र बाँकी रकम अन्य सुविधाको लागि छुट्याइएको छ ।

कार्यक्रममा गढवा गाउँपालिका उपाध्यक्ष शारदाकुमारी चौधरी प्रमुख प्रशासकीय अधिकृत कृष्णप्रसाद पौडेल लगायतकाले बोल्नुभएको थियो भने कार्यक्रमको सञ्चालन गढवा गाउँपालिका प्रशासन शाखा प्रमुख पुनाराम शर्माले गर्नुभएको थियो।

गढवा,११ वैशाख। दाङको गढवा गाउँपालिका का उद्यमी महिलाहरूले सामूहिक रूपमा जग्गा भाडामा लिएर व्यवसायिक रूपमा बेसार खेती सुरु गरेका छन् ।

गढवा गाउँपालिका वडा नम्बर १ मलमलामा गढवा गाउँपालिकामा सञ्चालित भिटा परियोजनाद्वारा गठित महिला उद्यमी समूहका सदस्यहरूले व्यवसायिक रुपमा २१ कट्ठा जमिनमा बेसार खेती सुरु गरेका हुन्।

गढवा गाउँपालिका वडा नम्बर १ मलमलाका २२ जना उद्यमी महिलाहरूले २१ कट्ठा जग्गा भाडामा लिएर बेसार खेती सुरु गर्नुभएको गढवा गाउँपालिका भिटा परियोजना संयोजक वसन्तकुमार शर्माले जानकारी दिनुभयो।

उद्यमी महिलाहरूलाई बेसार खेती सुरुवात गर्नका लागि गढवा गाउँपालिकामा सञ्चालित गढवा कृषि तथा पशु विकासमा आधारित साना किसान तथा युवा उद्यमशीलता विकास साझेदारी परियोजना (भिटा परियोजना)ले बेसारको बिउ उपलब्ध गराएको हो।

गढवा गाउँपालिका वडा नम्बर १ मलमलामा गठित चौतारी उद्यमी महिला समूहका सदस्यहरूले सामूहिक रूपमा जग्गा भाडामा लिएर बेसार खेती सुरु गरेको भिटा परियोजनाका कार्यक्रम संयोजक शर्माले जानकारी दिनुभयो। गढवा गाउँपालिकाको पहलमा बाजो जमिनलाई उपयोग गर्दै बेसार खेती सुरु गरेको हो।

सामुहिक बेसार खेतीको लागि बेसारको बिउ बितरण कार्यक्रममा बोल्दै गढवा गाउँपालिका अध्यक्ष यमनारायण शर्मा पोख्रेलले उद्यमी महिलाहरुलाई आत्मनिर्भर बन्नका लागि गाउँपालिकाले उत्पादन मुलक कार्यहरुको थालनी गरेको बताउनु भयो । समाजमा महिला आत्मनिर्भर नबने सम्म समृद्धिको बाटो तय नहुने भन्दै सर्व प्रथम महिलाहरुलाई व्यावसायिक उत्पादनमा जोड्न गाउँपालिकाले भिटा परियोजना मार्फत विभिन्न कार्यक्रमहरू सञ्चालन गरिरहेको बताउनुभयो। गाउँपालिकाले महिला सशक्तिकरण व्यवसायिक रुपमा उत्पादन गरे सहज बजारीकरणका लागि पालिकाले हरसम्भव प्रयास गरीरहेको बताउनुभयो।

व्यवसायिक रूपमा कृषि र पशु क्षेत्रमा काम गरे विदेश जान नपर्ने बताउँदै पालिका अध्यक्ष पोखरेलले उद्यमी महिलाहरूलाई व्यवसायिक रुपमा उत्पादन बढाउन जोड दिन आग्रह गर्नुभयो।