गढवा, ८ श्रावण। गढवा गाउँपालिका–५ जमुनीबासस्थित कोइलाबास हुलाकी सडकखण्डमा बिहीबार बिहान भएको मोटरसाइकल दुर्घटनामा परी दुई जना युवक गम्भीर घाइते भएका छन्।
ईलाका प्रहरी कार्यालय गढवाका अनुसार बिहीबार बिहान २ बजेर १५ मिनेटतिर भे २ प ८१५६ नम्बरको मोटरसाइकल जमुनीबास पुलबाट अनियन्त्रित भई तल खस्दा मोटरसाइकलमा सवार दुवै जना घाइते भएका हुन्। दुर्घटनामा परेका दुबै जना राजपुर गाउँपालिका–२ बेला निवासी २८ वर्षीय जीवन विक र सोही ठाउँका २८ वर्षीय खुमबहादुर खड्का रहेका छन्।
दुर्घटनापछि दुवैको टाउको र छातीमा गम्भीर चोट लागेको प्रहरीले जनाएको छ। प्रारम्भिक उपचार लमही र घोराहीका अस्पतालमा गरिएको भए पनि थप उपचारका लागि बुटवल रिफर गरिएको एम्बुलेन्स चालक ट्रेड युनियन संघ दाङका अध्यक्ष देविराज चौधरिले जानकारी दिनुभयो ।
प्रहरीका अनुसार रातको समयमा सांस्कृतिक कार्यक्रम (नाच) हेरेर फर्किने क्रममा मोटरसाइकल अनियन्त्रित भई दुर्घटना भएको प्रारम्भिक अनुमान गरिएको छ। घटनाको थप अनुसन्धान भइरहेको प्रहरीको भनाइ छ।
