गढवा,१४ असार। गढवा गाउँपालिकाको आयोजनामा बालश्रम निवारण सम्बन्धी अभिमुखीकरण कार्यक्रम सम्पन्न गरिएको छ। गाउँपालिका अन्तर्गत क्रियाशील बाल सञ्जालका पदाधिकारीहरूलाई लक्षित गरी एकदिवसीय गढवा गाउँपालिकाको कार्यालयमा उक्त अभिमुखीकरण कार्यक्रम सम्पन्न भएको हो।
कार्यक्रममा बाल श्रम निवारण सम्बन्धी व्यवस्था, बालश्रम न्यूनीकरण तथा बाल अधिकारको संरक्षण सम्बन्धी विषयमा जानकारी प्रदान गरिएको थियो। बालश्रम रोकथामका लागि समुदायस्तरमा बालबालिकाको सशक्तिकरण, शिक्षा पहुँच वृद्धि र चेतनामूलक गतिविधिको भूमिका अत्यन्त महत्वपूर्ण रहेको कार्यक्रमका सभाध्यक्ष तथा वडा नम्बर ५ का वडाअध्यक्ष लेखबहादुर थापाले बताउनुभयो । कार्यक्रमले बालश्रम निवारणका लागि बालबालिकाहरू स्वयं सचेत, सशक्त र नेतृत्वदायी बन्ने अवसर दिएको वडाध्यक्ष थापाले बताउनुभयो।
कार्यक्रममा प्रशिक्षक तथा बालमैत्री स्थानीय शासन बिज्ञ बिकिरण गौतम बालश्रमको कानुनी प्रावधान, समुदायमा देखिने बालश्रमका प्रकार, विद्यालयको भूमिकासहित बालश्रमको न्यूनीकरणमा बालबालिकाहरूको सक्रियता कस्तो हुनुपर्छ भन्ने विषयमा प्रशिक्षण दिनु भएको थियो । साथै, शिक्षा र आत्म-सुरक्षाको महत्वबारे समेत जानकारी दिइएको थियो।
सहभागी बालबालिकाहरूले आफूले सिकेका विषयहरू विद्यालय र समुदायमा फैलाउने र बालश्रम अन्त्य गर्न सहयोग गर्ने प्रतिबद्धता जनाएका थिए। सहभागीहरूले बालश्रमविरुद्धको अभियानमा बाल सञ्जालको सक्रियता अझ बढाउने बताएका थिए।
कार्यक्रमको आयोजना गढवा गाउँपालिकाको महिला, बालबालिका तथा जेष्ठ नागरिक शाखाले गरेको हो। सहभागी बाल सञ्जालका प्रतिनिधिहरूले आफूले सिकेका विषयहरू विद्यालय र समुदायमा लागू गर्दै बालश्रम विरुद्धको अभियानलाई थप प्रभावकारी बनाउने प्रतिबद्धता जनाएका थिए ।
अभिमुखीकरण कार्यक्रमा लामो समयदेखि बालबालिकाको क्षेत्रमा काम गर्दै आउनु भएका बालमैत्री स्थानीय शासन बिज्ञ बिकिरण गौतम रहनुभएको थियो भने कार्यक्रमको सञ्चालन गढवा गाउँपालिका महिला, बालबालिका तथा जेष्ठ नागरिक शाखाकी प्रमुख प्रेरणा चन्दले गर्नुभएको थियो।
