गढवा,७ जेठ। गढवा गाउँपालिका महिला, बालबालिका तथा जेष्ठ नागरिक शाखाको आयोजनामा आदिवासी जनजातिका लागि २० दिने थाकलको पातबाट सजावटी सामग्री निर्माणसम्बन्धी सीपमूलक तालिम वडा नम्बर ४ मा सम्पन्न भएको छ।
तालिमको समापन समारोह वडा नम्बर ४ का वडाध्यक्ष हरिभगत चौधरीको अध्यक्षता, गाउँपालिका अध्यक्ष यम नारायण शर्मा पोखरेलको प्रमुख आतिथ्यता तथा उपाध्यक्ष शारदा कुमारी चौधरीको विशिष्ट आतिथ्यतामा सम्पन्न भएको हो।
कार्यक्रमका प्रमुख अतिथि अध्यक्ष यम नारायण शर्मा पोख्रेलले आदिवासी समुदायको जीवनस्तर उकास्न यस्ता सीपमूलक तालिमहरू महत्वपूर्ण हुने बताउनुभयो। उहाँले भन्नुभयो, “स्थानीय स्रोत साधनको प्रयोगमार्फत रोजगारी सिर्जना गर्ने खालका तालिमहरू सञ्चालन गर्दै जाने गाउँपालिकाको नीति छ। थाकलको पातबाट उत्पादन गरिने सामग्रीहरू बजारमुखी बनाउन सकिन्छ।”
कार्यक्रम अध्यक्ष वडा नं. ४ का वडाध्यक्ष हरिभगत चौधरीले सहभागी महिलाहरूलाई सिकेको सीपलाई व्यवहारमा उतार्न आग्रह गर्दै भन्नुभयो, “सिर्जनशीलताको प्रयोगमार्फत सजावट सामग्रीहरूलाई व्यावसायिक रूपमा अगाडि बढाउने हो भने यसले आर्थिक सशक्तीकरणमा ठूलो भूमिका खेल्न सक्छ।”
विशिष्ट अतिथि उपाध्यक्ष शारदा कुमारी चौधरीले महिलाहरूलाई आत्मनिर्भर बनाउने यस्ता तालिमहरूलाई अझ प्रभावकारी बनाउन आवश्यक रहेको बताउनुभयो। उहाँले भन्नुभयो, “महिलाहरू घरमै बसेर आम्दानी गर्न सक्ने वातावरण बनाउने हाम्रो प्रयास हो। पालिकाले यस्ता तालिमहरूलाई निरन्तरता दिनेछ।”
२० दिने तालिममा वडा नम्बर ३, ४ र ५ का आदिवासी समुदायका महिला सहभागी रहेका थिए। प्रशिक्षक श्रीकुमारी चौधरीले थाकलको पातबाट विविध सजावट सामग्रीहरू – जस्तै मालाहरू, वालह्याङ्गिङ, झ्यालसाज, टोपी, टोकरा आदि निर्माण गर्ने तरिका सिकाउनु भएको थियो।
समापन कार्यक्रममा कार्यपालिका सदस्य तथा वडा नम्बर ४ की सदस्य रमा भण्डारी, विभिन्न वडाका सहभागीहरू तथा स्थानिय समुदायको उल्लेखनीय उपस्थिति रहेको थियो। कार्यक्रमको सञ्चालन महिला बालबालिका तथा जेष्ठ नागरिक शाखा प्रमुख प्रेरणा चन्दले गर्नुभएको थियो।
गढवा गाउँपालिकाले आगामी दिनमा पनि सीपमूलक तालिमहरूलाई प्राथमिकता दिँदै समुदायमा आधारित विकास कार्यक्रमहरू सञ्चालन गर्ने जनाएको छ।
