गढवा, २७ श्रावण । गढवा गाउँपालिका वडा नम्बर ५ कक्रहवाका महिला उद्यमीले अब आधुनिक मेसिनको प्रयोग गरी दुना टपरी उत्पादन गर्ने भएका छन्। युएन ह्याबिट्याट र गुड नेवर्स इन्टरनेसनल नेपालको आर्थिक तथा प्राविधिक सहयोगमा कक्रहवा महिला कृषक समूहलाई तीन आकारका डाइ सहितको उच्चस्तरीय दुना टपरी बनाउने मेसिन हस्तान्तरण गरिएको हो।
सामुदायिक आत्मनिर्भर सेवा केन्द्र (CSRC) को विशेष पहल तथा गढवा गाउँपालिका वडा नं. ५ को समन्वय र सहकार्यमा मेसिन हस्तान्तरण गरिएको जलवायु मैत्री कार्यक्रमकी संयोजक निलम त्रिपाठीले जानकारी दिइन्।
मेसिन प्राप्त भएपछि स्थानीयस्तरमा सहजै उपलब्ध हुने पातबाट दुना टपरी उत्पादन गरी बिक्रीमार्फत महिलाको आयआर्जन बढाउन सहयोग पुग्ने अपेक्षा गरिएको छ। परम्परागत सीपलाई आधुनिक प्रविधिसँग जोड्दै महिलालाई उद्यमशील र आत्मनिर्भर बनाउने उद्देश्यले मेसिन उपलब्ध गराइएको हो।
कक्रहवा महिला कृषक समूहकी उद्यमी महिलाहरुले सामूहिक रूपमा दुना टपरी उत्पादन गरी स्थानीय बजारमा बिक्री गर्ने योजना बनाएका छन्। यसबाट एकातर्फ महिलाको रोजगारी र आम्दानी बढ्ने तथा अर्कोतर्फ प्लास्टिकजन्य सामग्रीको प्रयोग घटाउन समेत सहयोग पुग्ने विश्वास गरिएको छ।
सामुदायिक आत्मनिर्भर सेवा केन्द्रले गढवा गाउँपालिकाका विभिन्न क्षेत्रमा यसअघि पनि सहकार्य गर्दै आएको त्रिपाठीले बताउनुभयो। वैकल्पिक ऊर्जा प्रवर्द्धन केन्द्र र गढवा गाउँपालिकाको संयुक्त लगानीमा वितरण हुँदै आएको विद्युतीय तथा सुधारिएको चुलो कार्यक्रम तथा गढवा गाउँपालिका वडा नम्बर ५ सिमलतारामा सञ्चालित सिँचाइ र खानेपानीसम्बन्धी कार्यक्रममासमेत केन्द्रले सहकार्य गरेको उहाँले जानकारी दिनुभयो।
मेसिन हस्तान्तरण कार्यक्रममा गढवा गाउँपालिका ५ का वडा सदस्य खिमा डाँगी, निर्मला परियार, नरेश चौधरी, जलवायु मैत्री कार्यक्रमका वित्त अधिकृत दमन बुढाथोकी, कृषि प्राविधिक सागर शर्मा, गढवा गाउँपालिकाका प्रेस संयोजक आलोक भावुक तथा कक्रहवा महिला कृषक समूहका पदाधिकारी र कर्मचारीलगायतको सहभागिता थियो।
कार्यक्रम कक्रहवा महिला कृषक समूहकी अध्यक्ष शिवा दङ्गोलको अध्यक्षता तथा गढवा गाउँपालिका वडा नम्बर ५ का वडाध्यक्ष लेखबहादुर थापाको प्रमुख आतिथ्यमा सम्पन्न भएको थियो।
