बुटवल । अल्पमत रहँदा रहँदै लुम्बिनी प्रदेशकाे मुख्यमन्त्रीमा शंकर पोखरेललाई नियुक्ति र शपथ दिलाएको भन्दै नेपाली काँग्रेसले आक्रोश पोखेकाे छ । नेपाली काँग्रेस पार्टी सम्बद्ध प्रदेशसभाका प्रमुख सचेतकले प्रदेश प्रमुखको भूमिकामाथि प्रश्न उठाउँदै पोखरेलको शपथ संविधान विपरीत रहेको बताएका छन् ।
नेपाली काँग्रेसको लुम्बिनी प्रदेशका संसदीय दलका प्रमुख सचेतक फखरुदीन खानले प्रदेश प्रमुखबाट संविधानको गम्भीर उल्लंघन भएको आरोप लगाए। उनले बल मिच्याइँ गरेर पोखरेललाई मुख्यमन्त्री नियुक्त गरिनु र विपक्षीहरुको विरोधका बाबजुद जबर्जस्ती सपथ गराउनु लोकतन्त्रकै उपहास भएको टिप्पणी गरेका छन् ।
‘लुम्बिनी प्रदेशमा नेकपा एमालेको बहुमत गुमिसकेको प्रस्ट हुँदाहुँदै पनि संविधानको धारा १६८ को उपधारा १ लाई गलत व्याख्या गरी एमालेको सरकार बनाएर शंकर पोखरेललाई मुख्यमन्त्रीमा नियुक्त गरिएको छ’ उनले भने, ‘ याे संविधानकै उपहास हो।’
यस्तो अलाेकतान्त्रिक कार्यले प्रदेशमा भोलिका दिनमा मुठभेड निम्त्याउने उनले बताए । उनका अनुसार विपक्षी गठबन्धनले बहुमत सांसद संख्या पुर्याएर ४२ जनाको हस्ताक्षर र उपस्थितिमा कुलप्रसाद केसीलाई मुख्यमन्त्रीमा नियुक्त गर्न प्रदेश प्रमुख समक्ष गरेको सिफारिस लत्याएर अल्पमतमा रहेका पोखरेललाई जबरजस्ती मुख्यमन्त्रीमा नियुक्त गर्नु संविधानको घोर उल्लंघन हो ।
