काठमाडौं, फागुन १६ – कुवेतस्थित नेपाली राजदूतावासले कुवेत र इराकमा रहनुहुने नेपाली नागरिकलाई सुरक्षा सतर्कता अपनाउन आग्रह गरेको छ।
मध्यपूर्वमा विकसित पछिल्लो घटनक्रमलाई नजिकबाट नियालिरहेको जनाउँदै दूतावासले त्यहाँ बसोबास गर्ने सम्पूर्ण नेपालीलाई सचेत र सूचित रहन अनुरोध गरेको हो।
दूतावासद्वारा जारी सूचनामा कुवेत र इराक सरकारबाट जारी गरिएका सुरक्षा सम्बन्धी निर्देशन र सूचनाको कडाइका साथ पालना गर्न भनिएको छ। साथै, अत्यावश्यक कामबाहेक घर बाहिर ननिस्कन र अनावश्यक यात्रा नगर्न समेत अनुरोध गरिएको छ।
हाल कुवेतको हवाई क्षेत्र बन्द रहेको उल्लेख गर्दै कुवेतबाट बाहिरिने तथा कुवेत आउने हवाई यात्रुहरूले सम्बन्धित वायु सेवा प्रदायकसँग सम्पर्क गरी यात्राको अवस्था यकिन गर्न पनि दूतावासले सुझाव दिएको छ।
त्यसैगरी, स्थानीय समाचार स्रोत र सरकारी आधिकारिक निर्देशनबाट नियमित रूपमा जानकारी लिन तथा सुरक्षित रहने उपायबारे आफ्ना कार्यस्थलबाट पनि जानकारी राख्न आग्रह गरिएको छ।
आपतकालीन अवस्थामा सम्पर्कका लागि दूतावासले हटलाइन/व्हाट्सएप नम्बर +९६५-६१००८९५६ र इमेल eonkuwait@mofa.gov.np सार्वजनिक गरेको छ।
नेपाली राजदूतावास, कुवेतले फागुन १६ (२८ फेब्रुअरी २०२६) मा उक्त सूचना जारी गरेको हो।
