गढवा, २५ असार ।गढवा गाउँपालिकाले लैङ्गिक तथा यौनिक अल्पसंख्यक समुदायको सशक्तिकरण, आत्मनिर्भरता र उद्यमशीलता प्रवर्द्धनका लागि सैलुन व्यवसाय सञ्चालनमा सहयोग स्वरूप ४१ प्रकारका आवश्यक सामग्री हस्तान्तरण गरेको छ।
गढवा गाउँपालिका महिला, बालबालिका तथा जेष्ठ नागरिक शाखाको आयोजनामा सम्पन्न उक्त कार्यक्रममा गाउँपालिका उपाध्यक्ष शारदाकुमारी चौधरीले कार्यक्रमको अध्यक्षता गर्नुभएको थियो। सामग्री स्यानी कुमाल (बिजय) लाई हस्तान्तरण गरिएको हो, जसले सैलुन व्यवसायमार्फत स्वरोजगारको बाटो समाउने योजना बनाएका छन्।
कार्यक्रममा बोल्दै उपाध्यक्ष चौधरीले भन्नुभयो, “गढवा गाउँपालिका समावेशी तथा समानुपातिक विकासको पक्षधर छ। समाजमा पछाडि पारिएका, बहिष्कृत तथा अल्पसंख्यक समुदायलाई मुख्य प्रवाहमा ल्याउन हामी निरन्तर प्रयासरत छौं। यौनिक तथा लैङ्गिक अल्पसंख्यक समुदायप्रति हाम्रो नीति सहयोगी र संवेदनशील रहेको छ। आजको यो सहयोग केवल सामाग्री हस्तान्तरण होइन, आत्मबल, सम्भावना र सम्मान हस्तान्तरण पनि हो।”यस प्रकारको कार्यक्रम गाउँपालिकाको सामाजिक उत्तरदायित्व अन्तर्गत हुने समानुपातिक बजेट विनियोजनको उत्कृष्ट उदाहरण भएको बताउनुभयो।
त्यसैगरी कार्यक्रममा बोल्दै गढवा गाउँपालिकाका प्रमुख प्रशासकीय अधिकृत कृष्णप्रसाद पौड्यालले भन्नुभयो, “यौनिक तथा लैङ्गिक अल्पसंख्यक समुदायले लामो समयदेखि अवसरको अभाव भोग्दै आएका छन्। राज्यका सबै तहले उनीहरूको आत्मसम्मान, समान अधिकार र जीविकोपार्जनको अधिकारलाई सुनिश्चित गर्नुपर्छ। गढवा गाउँपालिकाले यो विषयमा अग्रसरता लिएकोमा मलाई गर्व छ।”
उहाँले पालिकाले आगामी दिनमा पनि अल्पसंख्यक तथा वञ्चित समुदायलाई उद्यमशीलता र स्वरोजगारमा जोड्ने कार्यक्रमलाई प्राथमिकता दिँदै जाने प्रतिबद्धता जनाउनुभयो।
हस्तान्तरण गरिएका सामग्रीमा समाजथ्रेडिङ चेयर, ट्रली सेट, स्माण्ड फ्यान, ड्रायर, हियर आइरन, फेसियल प्याक, ऐना, हियर कटिङ मेसिन सेट, हियर स्टेट क्रिम लगायत ४१ प्रकारका सामग्री समावेश गरिएको छ।
स्थानीय सरकारको यस्तो प्रयासले समुदायमा स्वरोजगारको बाटो खुलेको र सामाजिक आत्मविश्वास पनि मानव स्वास्थ्य समाज घोराही दाङकी कार्यक्रम संयोजक जुनु चौधरीले बताउनुभयो।
कार्यक्रममा मानव स्वास्थ्य समाज घोराही दाङकी कार्यक्रम संयोजक जुनु चौधरी, भीम नेपाली, स्यानी कुमाल (बिजय) लगायतको उपस्थिति रहेको थियो भने कार्यक्रमको सञ्चालन महिला, बालबालिका तथा जेष्ठ नागरिक शाखाकी प्रमुख प्रेरणा चन्दले गर्नुभएको थियो।
