गढवा, १७ असार। गढवा गाउँपालिका स्तरिय सहकारी सञ्जालले सहकारी संस्थाबाट ऋण लिएर किस्ता तथा ब्याज तिर्न आलटाल गर्ने व्यक्तिहरूका विरुद्ध स्थानीय सरकारले उपयुक्त कदम चाल्न माग गर्दै गाउँपालिका समक्ष औपचारिक रूपमा मागपत्र पेश गरेको छ।
सञ्जालका अध्यक्ष बेगम बहादुर गतराजको नेतृत्वमा गएको प्रतिनिधिमण्डलले गढवा गाउँपालिका अध्यक्ष यमनारायण शर्मा पोख्रेललाई उहाँकै कार्यकक्षमा भेटी ज्ञापनपत्र बुझाएको हो। सञ्जालले गढवा क्षेत्रका सहकारी संस्थाहरूले लगानी गरेका रकम समयमा असुल नहुनुका कारण संस्थाहरू आर्थिक संकटमा पर्ने खतरा बढिरहेको उल्लेख गर्दै ऋणीहरूले किस्ता तथा ब्याज नतिरेको अवस्थाले सहकारी क्षेत्र कमजोर बन्ने चिन्ता व्यक्त गरेको छ।
ज्ञापनपत्रमा सहकारीको लगानी असुली प्रक्रिया सहज बनाउन आवश्यक कानुनी, सामाजिक तथा प्रशासनिक सहयोग उपलब्ध गराउन माग गरिएको छ। साथै, स्थानीय तहले जिम्मेवार व्यवहार देखाई सहकारीको आत्मनिर्भरतामा टेवा पु-याउनु पर्ने सन्देश समेत सञ्जालले दिएको छ।
गाउँपालिका अध्यक्ष यम नारायण शर्मा पोख्रेलले सहकारीहरू आर्थिक समावेशीकरण र ग्रामीण विकासको मेरुदण्ड भएकाले सहकारीको समस्यालाई गम्भीरतापूर्वक लिइने र आवश्यक पहल गरिने आश्वासन दिनुभएको सञ्जालका सदस्यहरूले जनाएका छन्।
गढवा गाउँपालिकाभित्रका विभिन्न सहकारी संस्थाहरूको साझा आवाजको रूपमा रहेको सञ्जालले यस्ता मुद्दामा पालिका र समुदायबीच सशक्त समन्वय कायम गर्दै अघि बढ्ने प्रतिबद्धता समेत जनाएको छ।
