गढवा, १ जेठ । गढवा गाउँपालिका वडा नम्बर ४ मा आज एक सामाजिक उत्तरदायित्वपूर्ण कार्य गर्दै अपाङ्गता भएका व्यक्ति र जेष्ठ नागरिकहरूलाई सामाजिक सुरक्षा भत्ता घरमै गई वितरण गरिएको छ।
वडाध्यक्ष हरिभगत चौधरीका अनुसार, जेष्ठ नागरिकहरूलाई बैंकसम्म जानु पर्ने, लाइन बस्नु पर्ने जस्ता कठिनाइलाई मध्यनजर गर्दै वडा कार्यालयले यो व्यवस्था मिलाएको हो। उहाँले भन्नुभयो, “जेष्ठ नागरिक र अपाङ्गता भएका व्यक्तिहरूलाई सेवा दिनु हाम्रो कर्तव्य हो। उहांहरूलाई सहज र सम्मानजनक सेवा दिन हामी वडाबाटै घरघरमा पुग्यौं।”
वडामा रहेका जेष्ठ नागरिक र अपाङ्गता भएका लाभग्राहीहरूको घरमै पुगेर सम्बन्धित रकम हस्तान्तरण गरिएको हो। यस कार्यमा वडा कार्यालयका कर्मचारी, जनप्रतिनिधि तथा बैककर्मी सहभागी हुनुभएको थियो।
यस सेवाबाट लाभान्वित भएका धेरै जेष्ठ नागरिक र अपाङ्गता भएका व्यक्तिहरूले वडा कार्यालयको यो कदमप्रति आभार व्यक्त गरेका छन्। घरमै सामाजिक सुरक्षा भत्ता पाउदा आफूहरुप्रतिको सम्मान महसुस गराएको प्रतिक्रिया दिनु भएको छ।
वडाध्यक्ष चौधरीले आगामी दिनमा पनि यस्ता सेवा अझ प्रभावकारी र नियमित बनाउँदै लैजाने प्रतिबद्धता व्यक्त गर्नुभएको छ।
