गढवा, २१ फागुन। गढवा गाउँपालिका द्वारा सञ्चालित भिटा परियोजना द्वारा गठित बाकी महिला उद्यमी समूह गढवा ५ बाकीमा आज बुधबार तिनदिने आधारशिला तालिम सम्पन्न भएको छ।
समूहकी अध्यक्ष सिता थापाको अध्यक्षता तथा गढवा गाउँपालिका अध्यक्ष यमनारायण शर्मा पोख्रेलको प्रमुख आतिथ्य तथा गढवा गाउँपालिका उपाध्यक्ष शारदा कुमारी चौधरी र ५ नम्बर वडाध्यक्ष लेख बहादुर थापाको बिशिस्ट आतिथ्यमा सम्पन्न भएको हो।
तिनदिने तालिमको समापन कार्यक्रममा बोल्दै प्रमुख अतिथि तथा गढवा गाउँपालिका अध्यक्ष यमनारायण शर्मा पोख्रेलले परियोजना मार्फत महिलाहरुलाई आत्मनिर्भर र समाजको नेतृत्व गर्ने खालको जनशक्ति तयार गर्ने उद्देश्य अनुरूप कार्यक्रम अघि बढेको बताउनुभयो। महिलाहरु व्यवसायीक रुपमा अघि नबढे सम्म आत्मनिर्भर बन्न नसकिने भएकोले कृषि तथा पशु पालनको क्षेत्रमा जुन सुकै क्षेत्रमा भएतापनि व्यवसायीक रुपमा उत्पादन गर्न अनुरोध गर्नुभयो। महिला शसक्तिकरण नभए सम्म समाज बदल्न नसकिने बताउदै अध्यक्ष पोख्रेलले महिलाहरु आत्मनिर्भर र सक्षम बन्नु पर्ने बताउनुभयो।
गढवा गाउँपालिकामा सञ्चालित कृषि तथा पशु विकासमा आधारित साना किसान तथा युवा उद्वमशिलता साझेदारी परियाेजना अन्तर्गत आर्थिक समृद्धीको लागि साझेदारी परियाेजना भिटा परियोजना अन्तर्गत गठन भएका बिभिन्न समूहमा आबद्ध उद्यमी महिलाहरुलाई आधारशिला तालिम दिदै आएको छ।
भिटा परियोजन गढवा गाउँपालिकाको सबै भन्दा ठूलो परियोजना हो, जसमा हेफर प्रोजेक्ट नेपालले प्राविधिक सहयोग र ग्रामीण महिला उत्थान केन्द्र घोराही दाङले सहजिकरण गर्दै आएका छन्।
हेफर प्रोजेक्ट नेपालले कर्मचारी लगायतकाको क्षेत्रमा सहजिकरण गरेको छ भने अन्य सबै गतिविधि, कृषि सामाग्री, बाख्रा, रागा लगायतका सबै खर्चमा गाउँपालिकाको लगानी रहेको छ।
कार्यक्रममा भिटा परियोजना कार्यक्रम संयोजक बसन्तकुमार शर्मा, फोकल पर्सन भिमकान्त चौधरीको सहभागिता रहेको थियो।
तालिममा ३० जना महिलाहरुको सहभागिता रहेको थियो।कार्यक्रमको सहजीकरण ५ नम्बर वडाकी सामुदायिक सहजकर्ता कल्पना चौधरीले गर्नु भएको थियो।
