गढवा, १३ मंसिर । गढवा पालिका स्तरिय संस्थागत बिद्यालय समितिको आयोजनामा बिहीबारदेखि गढवामा तिनदिने खेलकुद कार्यक्रम सुरु भएको छ।
गढवा गाउँपालिका संस्थागत विद्यालय समितिले मंसिर १३ देखि १५ गते सम्म खेलकुद कार्यक्रम आयोजना गरेको समितिका अध्यक्ष विकाश रजौरेले जानकारी दिनुभयो। खेल कार्यक्रम जनता माध्यमिक विद्यालय गढवाको खेल मैदानमा शुरु भएको छ ।
३ दिने गाउँपालिका स्तरीय खेलकुद कार्यक्रमको उद्घाटन कार्यक्रममा बोल्दै प्रमुख अतिथि तथा गढवा गाउँपालिका अध्यक्ष यमनारायण शर्मा पोख्रेलले विद्यार्थीहरुको बौद्धिक विकासको लागि खेलकुद महत्वपूर्ण भएको बताउनुभयो। विद्यार्थीहरुलाई शारिरिक, मानसिक र बौद्धिक विकासको लागि खेलकुद अपरिहार्य रहेको बताउदै गाउँपालिका अध्यक्ष पोख्रेलले खेलकुद कार्यक्रम आयोजना गरेको भन्दै गाउँपालिका स्तरीय संस्थागत विद्यालय समितिलाई धन्यवाद समेत दिनुभयो। खेलकुदबाट विद्यार्थीलाई अनुसाशित, संस्कारित साथै चौतर्फी विकास हुने भएकोले खेलकुदलाई महत्वका साथ बुझ्न आवश्यक रहेको बताउदै अध्यक्ष पोख्रेलले पछिल्लो समयमा खेलको लोकप्रियता जसरी बढेको छ त्यसमा विद्यार्थीहरुको सहभागिता गराउन, राष्ट्रिय स्तरको खेलाडी तयार गर्न विद्यालय स्तरबाटै खेलकुदलाई पहिलो प्रथामिक्तामा राख्न आवश्यक रहेको बताउनुभयो।
खेलकुद कार्यक्रमको उद्घाटन पालिका स्तरिय संस्थागत बिद्यालय समिति गढवाका अध्यक्ष तथा शुभतारा बोर्डिङ स्कुल गढवाका प्रिन्सिपल बिकास रजौरेको अध्यक्षता तथा गढवा गाउपालिकाका अध्यक्ष यम नारायण शर्मा पोख्रेलको प्रमुख आथित्य तथा गढवा गाउँपालिका वडा नम्बर ६ का वडाध्यक्ष विर बहादुर आले मगरको बिशिस्ट आतिथ्यमा सम्पन्न भएको हो ।
खेलकुद कार्यक्रम गढवा गाउँपालिकाका १३ वटा संस्थागत विद्यालयहरु सहभागिता जनाएका छन् । खेलकुद कार्यक्रममा १०० मिटर दौड छात्र छात्रा, म्याद रेस छात्र छात्रा, चित्रकला र फुटबल खेल समाबेस छन्।
खेलकुद उद्घाटन कार्यक्रममा लायन्स क्लब गढवाका अध्यक्ष उमाकान्त पन्त,रेडियो साझा आवाजका प्रवन्ध निर्देशक दुखहरण यादव,डिबेल बोर्डिङ स्कुलका भानु यादव,पालिका स्तरिय संस्थागत बिद्धालय समिति गढवाका सचिव तथा नेपाल बोर्डिङ स्कुलका प्रचार्या निर्मल रावत लगायतकाले बोल्नु भएको थियो ।
ज्ञान ज्योति बोर्डिङ स्कुलका प्रधानाध्यापक दिपक कुमार यादवको स्वागत मन्त्व्य बाट शुरु भएको कार्यक्रमको सहजिकरण बाल संसार एकेडेमिका प्रचार्या माधव शर्माले गर्नु भएको थियो ।
