गढवा, २० असार। दाङ देउखुरीको गढवामा आज बिहिबार देखि गढवा सांस्कृतिक रमाइलो मेला–२०८१ सुरु भएको छ । जनता माध्यमिक विद्यालय गढवाको खेलमैदानमा रमाइलो मेला सुरु भएको हो।
गढवा युवा क्लबको आयोजनामा असार २० गतेदेखि साउन १ गते सम्म सन्चालन हुने गढवा रमाइलो मेलाको उद्घाटन गढवा गाउँपालिका वडा नम्बर ६ का वडाध्यक्ष विर बहादुर आले मगरले गर्नु भएको हो।
मेला उद्घाटन गर्दै प्रमुख अतिथि तथा गढवा गाउँपालिका ६ नम्बर वडाध्यक्ष बिर बहादुर आले मगरले मेलाले आन्तरिक पर्यटन व्यवसाय लाई थप टेवा पुग्ने बताउनुभयो। गढवा सांस्कृतिक रमाइलो मेलाले समग्र गढवा गाउँपालिकाको पर्यटकिय क्षेत्रहरुको प्रचार प्रसारको साथै व्यापार व्यवसायमा टेवा पुग्ने बताउनुभयो।
त्यसैगरी उद्घाटन कार्यक्रममा बोल्ने बक्ताहरुले मेला बर्षातको समयमा नभई तिजको समयमा राखेको भए अझ उत्तम हुने बताएका थिए। आयोजनाले प्रत्येक दिन गढवा गाउँपालिकाभरी रहेका पर्यटकिय क्षेत्रहरुलाई चिनाउने हिसावले उद्घोष गर्नु पर्ने सुझाएका थिए । त्यसैगरी गढवा सांस्कृतिक रमाइलो मेलामा थारु समुदायको झूम्रा लाठी र बर्का नाच, त्यसैगरी गढवा पञ्चैबाजा कला संस्कृति संरक्षण केन्द्र बिशेष प्रस्तुती र अवधी भाषीको संस्कृतिक कार्यक्रमहरु दैनिक राख्नु पर्ने सुझाव दिएका थिए।
गढवा युवा क्लबका अध्यक्ष बिक्रम गुरुङको अध्यक्ष तथा गढवा गाउँपालिका ६ नम्बर वडाध्यक्ष बिर बहादुर आले मगरको प्रमुख आतिथ्य तथा क्लबका संस्थापक अध्यक्ष कृष्ण राज पाण्डे र गढवा उद्याेग बाणिज्य संघका अध्यक्ष ओम प्रकाश बसेलको बिशिस्ट आतिथ्यमा उद्घाटन भएको हो।
सांस्कृतिक तथा पर्यटनको विकासमा टेवा पुर्याउन उद्देश्यका साथ मेलाको आयोजना गरिएको गढवा युवा क्लबले जनाएको छ। गढवा रमाइलो मेलामा सांस्कृतिक कार्यक्रम, गढवा डान्स आइडल सँगै व्यापारीक स्टलहरु राखिएका छन् । मेला दिउँसो ४ बजेदेखि राति १० बजेसम्म सञ्चालन हुने बताईएको छ। मेलामा स्थानीय कलाकारसँगै राष्ट्रियरूपमा ख्याति कमाएका कलाकारहरुले प्रस्तुति दिनेछन्।
रमाइलो मेला संगै गढवा डान्स आइडल समेत हुने भएको छ। गढवा डान्स आइडलमा प्रथम हुनेलाई १० हजार, द्वितीय हुनेलाई ५ हजार र तृतीयलाई ३ हजार नगद,ट्रफी र सम्मान पत्रले सम्मान गरिने आयोजकले जानकारी दिएको छ। मेलामा प्रवेशका लागि सय रुपैयाँ टिकट तोकिएको छ।
मेलाको उद्घाटन कार्यक्रममा ६ नम्बर वडासदस्य गोबिन्द रोका मगर, गढवा उद्याेग बाणिज्य संघका अध्यक्ष ओम प्रकाश बसेल, गढवा होटल ब्यवसायी संघका डेगमान जिसी, गढवा पञ्चैबाजा कला संस्कृति संरक्षण केन्द्रका अध्यक्ष दयाराम थापा, जनता माध्यमिक विद्यालय गढवाका विद्यालय व्यवस्थापन समितिका अध्यक्ष गणेश कुमार कुमाल, क्लबका संस्थापक अध्यक्ष कृष्ण राज पाण्डे लगायतकाले शुभकामना मन्तव्य दिनु भएको थियो।
कलाकार तथा मोडल भुलन गुप्ताको स्वागत मन्तव्य बाट सुरु भएको कार्यक्रमको सहजिकरण बहु चर्चित उद्घोषक अनुप बुढा मगरले गर्नुभएको थियो।
