गढवा, २६ फागुन। दाङ देउखुरीको गढवामा पार्किङ गरिएको स्कुल बसमा शुक्रबार आगलागी भएको छ। गढवा गाउँपालिका वडा नम्बर ६ गढवा बजार स्थित ज्ञानज्योति इङ्लिस बोर्डिङ स्कुलको बसमा शुक्रबार राति अचानक आगलागी भएको हाे।
गढवा गाउँपालिका वडा नम्बर २ बघमरुवा निवासी अर्जुन योगीको घरको आँगनमा पार्किङ गरिएको स्कुल बस आगलागी भएको हो ।
लु १ क ५३३५ नम्बरको स्कुल बसमा आगलागी भएको इलाका प्रहरी कार्यालय गढवाका प्रहरी निरीक्षक नवीन वलिले जानकारी दिनुभयो । आगलागी के कति कारणले लागेको अझै सम्म खुल्न नसकेको प्रहरी निरीक्षक वलीले जानकारी दिनु भयो। हामी अनुसन्धान गरिरहेका छौ, घटना के कति कारणले भयो अझै सम्म खुल्न सकेको छैन-निरिक्षक वलील भन्नु भयो ।
प्रत्यक्षदर्शीका अनुसार पार्किङमा रहेको बसमा रातको समयमा एक्कासि आगलागी भएको हो। आगलागीको सूचना पाउन साथ गढवा गाउँपालिकाको दमकल, प्रहरी तथा स्थानीयको पहलमा आगो नियन्त्रणमा लिइएको थियो।
राति साढे १० बजेतिर बसमा आगलागी भएको विद्यालयका शेयर सदस्य ऋषिराम यादवले जानकारी दिनुभयो। आगलागीको कारण भने अझै खुल्न सकेकाे छैन।
