जन्ती आएकाहरूमाथि आक्रमण हुँदा २ जना घाइते भएका छन् ।
मोरङको सुनवर्षी–९ डाइनियाबाट बेहुली लिन जहदा–२ मझारे टोलमा आएका जन्तीमाथि बीचबाटैमा गाडी रोकेर सोमवार राति आक्रमण भएको थियो ।
स्थानीय ६–७ जना युवाको समूहले बाटो छेकेर राति १ बजेतिर आक्रमण गरेको मोरङ प्रहरीका प्रवक्ता डीएसपी दीपक श्रेष्ठले जानकारी दिए ।
को१८प ७५४१ नम्बरको एउटा मोटरसाइकलमा आगजनी समेत गरिएको समेत उनले बताए । आगजनीबाट मोटरसाइकलमा पूर्णरूपमा क्षति पुगेको छ ।
घटनामा परेर जन्ती आएका अन्दाजी २३ वर्षीय मिथलेश झा र रोहित सिंह सामान्य घाइते भएका छन् । घाइतेको विराटनगरस्थित कोशी अस्पतालमा उपचार भइरहेको छ । बेहुला लगायत अरु जन्ती सकुशल छन् ।
घटनामा संलग्न भएको आशंकामा जहदा–२ का विकास मण्डललाई प्रहरीले नियन्त्रणमा लिएर घटनाको अनुसन्धान थालेको छ ।
अन्य युवाहरू फरार रहेकाले खोजी जारी राखेर घटनाको अनुसन्धान थालिएको श्रेष्ठले बताए ।
