संस्कारबिहीन राजनीति – माओवादी केन्द्र

बुटवल । अल्पमत रहँदा रहँदै लुम्बिनी प्रदेशकाे मुख्यमन्त्रीमा शंकर पोखरेललाई नियुक्ति र शपथ दिलाएको भन्दै नेकपा माओवादी केन्द्रले आक्रोश पोखेकाे छ । माओवादी केन्द्र लुम्बिनी प्रदेशसभाका प्रमुख सचेतक तुलाराम घर्ती मगरले मुख्यमन्त्रीमा पोखरेलको पुनः नियुक्ति र सपथ ग्रहणलाई संस्कारबिहीन राजनीतिको संज्ञा दिएका छन् । उनले लुम्बिनी प्रदेशमा नेकपा एमालेको बहुमत गुमिसकेको दावी गर्दै जबरजस्ती पोखरेललाई मुख्यमन्त्री नियुक्त गरेर शपथ दिलाउने काम प्रदेश प्रमुखले गरेको आरोप लगाए ।

उनले कानुन मिचेर पोखरेललाई मुख्यमन्त्रीमा नियुक्त गर्नु संविधान विपरीतको कदम भएको दावी गर्दै यसको प्रतिरोध कानुनी र राजनीति दुवै हिसाबले गर्ने बताए । उनले यो संसद सरकारले बोलाएको नभई प्रदेशका एक चौथाई सांसदहरुले बोलाएकाले सरकारले प्रदेशसभाको विशेष अधिवेशन अन्त्य गर्न नपाउने पनि बताए । लुम्बिनी प्रदेशका मुख्यमन्त्रीकाे शपथ ग्रहण जबर्जस्ती गुन्डाराजजस्तै भएको संज्ञा दिँदै उनले यसको कडा प्रतिरोध गरिने पनि बताए ।

विपक्षी गठबन्धनले बहुमत सांसद संख्या पुर्याएर ४२ जनाको हस्ताक्षरसहित प्रदेश प्रमुख समक्ष गरेको सिफारिसलाई लत्याउँदै अल्पमतमा रहेका पोखरेललाई जबरजस्ती मुख्यमन्त्रीमा नियुक्त गरेर प्रदेश प्रमुखले बदमासी गरेको उनकाे भनाइ छ । गठबन्धनका दलहरूसँग बसेर राजनीतिक र कानुनी उपचारको खोजी गर्ने प्रमुख सचेतक घर्ती मगरले बताएका छन् ।