काठमाडाैं । लुम्बिनी प्रदेशको आन्तरिक राजनीति नाटकीय मोडमा पुगेकाे छ । याेसँगै एमालेकाे एकल सरकार बनाउने सपनामा तुषारापात भएकाे छ ।
आइतबार बिहान लुम्बिनी प्रदेशका मुख्यमन्त्री शंकर पोखरेलले राजीनामा दिएपछि शुरु भएको नयाँ सत्ता समिकरणको खेल आफ्नै सांसदले दलबाट राजीनामा दिएपछि तुषारापात हुँदै नाटकीय मोडमा पुगेको हो ।
पोखरेललाई नै पुन: मुख्यमन्त्री बनाउने एमाले संसदीय दलले गरेको निर्णयको मसी नसुक्दै एमालेकी सांसद बिमला ओलीले पार्टी फेरेर माओवादी केन्द्र प्रवेश गरेपछि सत्ता समिकरणको खेल नाटकीय मोडमा प्रवेश गरेकाे छ ।
दाङ ३ (ख) बाट प्रदेश सभाको निर्वाचन जितेर सांसद बनेका एमाले नेता उत्तर कुमार ओलीको सवारी दुर्घटनामा निधनपछि उनैकी पत्नी विमला ओली उपचुनावबाट साँसद बनेकी हुन्।
सरकार बनाउन आवश्यक ४१ मत सुरक्षित गर्न सक्दा एमालेले एकल बहुमतको सरकार बनाउने अवस्था थियो ।सुरक्षित भैसकेको सरकार बिमलाले साथ छोडेपछि अल्पमतमा परेको छ।
४१ जना सांसदसहित बहुमत रहेको लुम्बिनी प्रदेशमा एमालेका सांसद अब ४० मा झरेपछि अल्पमतमा पुगेको छ । जुन बहुमतको लागि एक सिट अपुग हो । यसले गर्दा एमालेको एकल सरकार बन्ने सम्भावना तत्काललाई टरेको छ ।
प्रधानमन्त्रीले अब लुम्बिनी प्रदेशसभा भंग गराउन राष्ट्रपतिसमक्ष सिफारिश गर्ने सम्भावना रहेको स्रोतको दाबी छ । यसो गर्दा सरकार बच्ने तर प्रदेश सभा मर्ने हुन्छ ।
‘माधव नेपाल पक्षका सांसद बिष्णु पन्थी र रमा घर्तीले फ्लोरक्रस गर्ने मुख्यमन्त्रीको आशंका थियो । तर, उहाँलाई आफ्नै निकट भनिएकाले साथ छाडे । अब यहाँ नयाँ परिस्थिति बन्यो । ४०-४० मा बाँडिएर एकल बहुमत हामीले गुमायौँ”,एक जना एमाले सांसदले भने।
तत्कालीन नेपाल कम्युनिस्ट पार्टी (नेकपा)बाट निर्वाचित प्रदेश सभा सदस्य विमला वलीले माओवादी केन्द्र रोजेपछि ८१ सदस्यीय प्रदेश सभामा एमालेको एकल बहुमत गुमेको छ । सर्वोच्चले नेकपा खारेज गरेको अवस्थामा उपनिर्वाचनमा दाङ ३ (ख)बाट निर्वाचित वलीले माओवादी केन्द्र रोजेकी हुन् ।
माओवादी केन्द्रले वलीले पार्टीमा प्रवेश गरेको औपचारिक जानकारी प्रदेश सभालाई गराइसकेको छ ।
८१ सदस्यीय लुम्बिनी प्रदेश सभामा एमालेका ४० सांसद भएका छन् । माओवादीका भने सभामुखसहित १९ सांसद भएका छन् । प्रदेश सभामा कांग्रेसका १९, जसपाका दुई र जनमोर्चाका एक सांसद छन् ।
विकसित घटनाक्रमलाई मध्यनजर गर्दै नयाँ परिस्थितिमा नयाँ निर्णय लिन प्रधानमन्त्री तथा एमाले अध्यक्ष केपी शर्मा ओलीले स्थायी समितिको आकस्मिक बैठक बोलाएका छन् ।
