नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका केन्द्रीय सदस्य तथा उपत्यका इन्चार्ज माइला लामा रिहा भएका छन् । उनी पछिल्लाे १४ महिनादेखि सङ्खुवासभा जिल्ला कारागारमा रहेका थिए ।
सरकार र विप्लव समूहबीच तीन बुँदे सहमति भएको दुई महिनापछि लामा बिहीबार रिहा भएका हुन् । सरकार र विप्लव समूहबीच फागुन २१ गते भएको सहमतिअनुसार गृह मन्त्रालयले सो समूहका नेता लामालाई रिहा गर्न सर्कुलर गरेको थियो ।
विप्लव नेतृत्वको नेकपा केन्द्रीय सदस्य तथा उपत्यका इन्चार्ज लामा २५ हजार धरौटी बुझाएर हिरासत मुक्त भएको जिल्ला अदालत चैनपुरका सूचना अधिकारी डिल्ली प्रसाईँले जानकारी दिए ।
नेता लामा विसं २०७६ साउन ५ गते काठमाडौँबाट पक्राउ परेका हुन् । लामालाई विभिन्न जिल्ला हुँदै सङ्खुवासभा ल्याइएको थियो । जिल्ला अदालत चैनपुरले सङ्गठित रूपमा हातहतियार ओसारपसार, सञ्चय तथा प्रयोग मुद्दामा रु २५ हजार धरौटी माग गरेको थियो ।
धरौटी बुझाउन नसकेपछि जिल्ला अदालत चैनपुर विसं २०७६ फागुन ७ गते कारागार चलान गरेको थियो । विप्लव समूहले आफ्ना नेता–कार्यकर्ता रिहा गर्ने सहमति पालना नभएको भन्दै असन्तुष्टि जनाउँदै आएको थियो ।
नेता लामालाई परिवारको जिम्मामा छाडिएको छ ।
नेता लामा तत्कालीन माओवादीको जनसांस्कृतिक महासङ्घको अध्यक्ष थिए । तर पार्टी विभाजनपछि मोहन वैद्य हुँदै उनी विप्लव समूहमा लागेका थिए । उनी जनयुद्धका घाइतेसमेत हुन् ।
माओवादी जनयुद्धको क्रममा उनका हातका केही औँलामा क्षति पुगेका छन् भने सुन्ने र देख्ने क्षमता पनि कमजोर बनेको छ । लामाले सयौँ क्रान्तिकारी गीत गाएका छन् र उनका जनवादी गीतहरु लाेकप्रिय मानिन्छन् ।
लामाकाे रिहाइपछि शुभचिन्तकहरुले उनलाइ खुला आकाशमा स्वागत छ भन्दै सामाजिक सञ्जालमा लेखेका छन् ।
