गढवा, १३ असार । गढवा गाउँपालिका–१, कालाकाटे स्थित जनता माध्यमिक विद्यालयमा आवासीय भवनको शिलान्यास गरिएको छ। गढवा गाउँपालिकाबाट विनियोजित ६२ लाख रुपैयाँको बजेटमा निर्माण हुन लागेको सो भवनको शिलान्यास गाउँपालिका अध्यक्ष यमनारायण शर्मा पोख्रेल (विश्वास) ले गर्नुभएको हो।
शिलान्यास समारोहमा वडा नम्बर १ का वडाध्यक्ष बाबुराम अधिकारी, स्थानीय उद्योगी, समाजसेवी, अभिभावक, शिक्षक तथा विद्यालय व्यवस्थापन समितिका सदस्यहरूको उपस्थिति रहेको थियो। कार्यक्रममा वक्ताहरूले विद्यालयमा आवासीय भवन निर्माणले विद्यार्थीहरूको सिकाइ र बसोबासको सहजता सुनिश्चित गर्ने विश्वास व्यक्त गर्नु भएको थियो।
गाउँपालिकाले शिक्षा क्षेत्रलाई प्राथमिकतामा राख्दै भौतिक पूर्वाधार सुदृढीकरणका कार्यक्रमलाई अघि बढाइरहेको जनाइएको छ। सो भवन निर्माण सम्पन्न भएपछि टाढाबाट आउने विद्यार्थीहरूलाई आवासीय सुविधा उपलब्ध गराउने लक्ष्य लिइएको विद्यालयले जनाएको छ।
