सिमकोट – लामो समय ग्रीन जोनका रुपमा रहेको हिमाली जिल्ला हुम्लाका चारवटा गाउँपालिकामा एकसाथ कोरोना संक्रमण फैलिएको छ। कोरोना संक्रमणसँग मिल्ने बिरामी बढेपछि स्वास्थ्य परीक्षण गरिएको थियो। त्यसक्रममा चार गाउँपालिकामा कोरोना संक्रमित फेला परेका हुन्।
तीन दिनको अन्तरालमा गरिएको परीक्षणमा २० जना कोरोना संक्रमित देखिएको ताँजाकोट गाउँपालिका स्थित मैला स्वास्थ्य चौकीका इन्चार्ज धनराज ढकालले बताए। उक्त गाउँपालिकाले सबै वडामा बिरामी संख्या बढेपछि आफ्नै लगानी गरेर एन्टिजेन किट खरिद गरि कोरोना परीक्षण गरेको थियो। त्यसअघि नेपालगञ्ज र सुर्खेतबाट आएका आठ जना यात्रुको सिमकोट विमानस्थलमा कोरोना परीक्षण गर्दा रिपोर्ट पोजेटिभ आएको थियो।
त्यसयता दैनिक रुपमा स्वास्थ्य सेवा कार्यालयले कोरोना परीक्षण गरिरहेको र संक्रमित फेला पर्ने क्रम बढिरहेको कार्यालय प्रमुख प्रेमबहादुर सिंहले बताए। उनका अनुसार सिमकोटमामात्र दश दिनमा १९ जना कोरोना संक्रमित देखिएका छन्। सर्केगार्ड गाउँपालिकामा नौ जनामा कोरोना देखिएको गाउँपालिकाका प्रमुख प्रशासकीय अधिकृत रुद्र शाहीले बताए।
यता अदानचुली गाउँपालिकामा दुई जनामा कोरोना देखिएको छ । स्वास्थ्य सेवा कार्यालयका प्रमुख सिंहका अनुसार जिल्लाका चारवटा गाउँपालिकामा ५० जनामा कोरोना संक्रमण देखिएको छ।
