गढवा, २७ बैशाख । गढवा गाउँपालिका उध्दम विकास शाखाको आयोजनामा तथा उद्योग वाणिज्य तथा आपूर्ति मन्त्रालयको आर्थिक सहयोगमा गरिवि निवारणका लागि लघु उद्यम विकास कार्यक्रम अन्तर्गत सञ्चालित एक महिने कटाई सिलाई तालिम सम्बन्धी थप एड्भान्सको तालिमको बुधबार गढवाको वडा नम्बर ५ चयनपुरमा समापन गरिएको छ ।
गढवा गाउँपालिका वडा नम्बर ५ का वडाध्यक्ष लेख बहादुर थापाको अध्यक्षता तथा गढवा गाउँपालिका उपाध्यक्ष शारदा कुमारी चौधरीको प्रमुख आतिथ्यमा तथा इलाका प्रहरी कार्यालय गढवा प्रमुख नविन ओलीको बिशिस्ट आतिथ्यमा समापन गरिएको हो ।
एक महिने एड्भान्स तालिमको समापन कार्यक्रम बोल्दै कार्यक्रमका प्रमुख अतिथि तथा गढवा गाउँपालिका उपाध्यक्ष शारदा कुमारी चौधरीले कटाई सिलाई तालिम सिकेर व्यावसायिक रुपमा स्थापित नहुंदा सम्म तालिमको मुख्य उद्देश्य पुरा नहुने बताउनु भयो। तालिम सिक्नुको मतवल व्यवहारमा लागु गर्नु भएको बताउदै उपाध्यक्ष चौधरीले सके व्यक्तिगत नसके सामुहिक रुपमा व्यवसाय गर्नु पर्ने बताउनु भयो ।
त्यसैगरी समापन कार्यक्रममा बोल्दै गढवा गाउँपालिका वडा नम्बर ५ का वडाध्यक्ष लेख बहादुर थापाले कटाई सिलाई तालिम आजको आवश्यकता भएको तर तालिम पश्चात कुनै पनि ब्यक्ति अथवा समूहले तालिमलाई व्यवहारमा उतार्न नसक्दा तालिमको प्रतिफल शुन्य देखिएको बताउनुभयो। तालिम सिकेर घरको कपडा कटाई सिलाई गर्नु पनि ठुलो उपलब्धि भएको बताउदै व्यवसायीक रुपमा काम गर्न चाहे वडा बाट पनि सबै खाले सहयोग हुने बताउनु भयो।
कार्यक्रममा गढवा गाउँपालिकाका वडा नम्बर ४ र ५ का गरी कुल २० जना महिलाहरु एड्भान्स तालिममा सहभागी भएका हुन्।
समापन कार्यक्रममा गढवा गाउँपालिकाका प्रशासन शाखा प्रमुख पुनाराम शर्मा, प्रमिला महतरा क्षेत्री, राजकुमारी यादव, उद्यम विकास सहजकर्ता बिनु भुजेल, लगाएतको उपस्थिति रहेको थियो भने कार्यक्रमको सहजिकरण उद्यम विकास सहजकर्ता मिना चौधरीले गर्नु भएको थियो ।
