दाङ – लमही नगरपालिकाका उपप्रमुख लक्ष्मी योगीले सीपले मानिसलाई जिविको पार्जनमा मद्धत गर्ने बताउनु भएको छ ।
लमही नगरपालिका- बनकट्टामा आयोजित गरिबी निवारणका लागि लघु उद्यम विकास कार्यक्रम (मेड्पा) द्वारा संचालित ४५ दिने होजियारी सम्बन्धि पूनर्ताजगी (स्तरउन्नति ) सीप विकास तालिम समापन कार्यक्रममा नगर उपप्रमुख योगीले सो कुरा बताउनु भएको हो ।
नगरपालिकाले उद्यमी बन्न चाहाने महिला दिदिबहिनीहरुका लागि विभिन्न सीप मुलुक तालिम प्रदान गर्दै आएको बताउनु भयो ।
नगरपालिकाले तालिम दिएर व्यवसायीक बनेर आर्थिक रुपले सबल बनेका धेरै उदाहरण भएको बताउदै अब जुन बस्तुको बजारमा माग छ सो कुराको अध्ययन गरि ती बस्तु उत्पादनको तालिम गराइने नगर उपप्रमुख योगीले बताउनु भयो ।
महिनौ दिनसम्म लाग्ने काम मेसिनको सहायताले एक हप्तामै सकिने भएको भन्दै मेसिन थप गरिदिन नगरपालिकालाई सहभागीहरुले आग्रह गर्नु भएको छ । मेसेनरी प्रयोगले सीपलाई द्रुतगतिमा लैजान सहयोग भएकोले आगामी दिनका तालिममा मेसिनहरु थपी दिए तालिममा सहज हुने सहभागी धनमाया चौधरीले बताउनु भयो ।
तालिमको प्रशिक्षक सीता चौधरीले नगरपालिकाले तालिम प्रदान गरेर बेरोजगार भएका महिलाहरुलाई रोजगारमुखी बनाएकोले सिकेको सीपलाई व्यवसायमा जोड्न आग्रह गर्नु भयो । आफै सीपमा दक्षता भैइयो भने परनिर्भर हुन नपर्ने प्रशिक्षक चौधरीको बुझाई छ ।
त्यसैगरि लमही नगरपालिका -२ का वडा सदस्य काशी प्रसाद चौधरीले छोटो समयको तालिमले मात्र पूर्णता नपाउने भन्दै उत्पादित बस्तुलाई बजारीकरण गर्न स्थानीय सरकारले सहजीकरण गर्दिनु पर्ने बताउनु भयो । हातले उत्पादन गर्ने भन्दा मेसेनरी बस्तु प्रयोग गरेर छिटोछरितो बस्तु उत्पादन तर्फ सबैले चासो दिनु पर्ने वडा सदस्य चौधरीले भन्नू भयो ।
लमही नगरपालिका-२ का वडा सदस्य तथा नगर कार्यपालिका सदस्य सुनिता चौधरीले लक्षित बर्गलाई चाहे जतिको बजेट छुट्याउन नसकिएको भन्दै आगामी दिनमा तालिमका लागि ठूलो आकारको बजेट विनियोजन गर्नमा आफ्नो भूमिका रहने बताउनु भयो । सीप सिकेर प्रशिक्षक भएको हामी देख्न चाहान्छौ, सबै दिदिबहिनीले आफ्नो सीपलाई व्यवसायमा जोड्नु होला”- उहाँले भन्नू भयो ।
आर्थिक वर्ष २०७७/७८ देखि अहिलेसम्म २ सय ४६ जना महिला पुरुषलाई तालिम प्रदान गरि उद्यमी बनाई सकेको उद्यम विकास सहजकर्ता रिता पुनले जानकारी दिनु भयो । २०७७/७८ बाट मेड्पाले नगरपालिकाका सबै वडामा सीपमूलक तालिम प्रदान गर्दै आएको छ ।
लमही नगरपालिकाले स्विटर बुन्ने, कटाई सिलाई, पशु पालन, बुटिक, दुनाटपरी, च्याउ खेती, गार्मेन्ट, चप्पल उत्पादन, डल कुशन जस्ता तालिम प्रदान गर्दै आएको छ ।
लमही नगरपालिकाले संचालन गरेको तालिमबाट सीप सिकेर थुप्रै महिलाहरु आय आर्जमा जोडिनु भएको छ ।
समापन कार्यक्रममा सहभागी शान्ता भैया मगरले उपस्थित भएका सबैलाई स्वागत मन्तव्य राख्नु भएको थियो भने कार्यक्रमको सहजीकरण उद्यम विकास सहजकर्ता प्रमिला योगीले गर्नु भएको थियो । तालिममा वडा नम्बर २ का बीस जना महिलाहरुको सहभागिता रहेको थियो ।
